Friday, May 7, 2010

കട്ടപ്പന സൂപ്പര്‍ കിടിലന്‍സ് പുതിയ ഐ.പി.എല്‍ ടീം

ബൂലോകം ഓണ്‍ലൈന്‍ - Breaking News
കട്ടപ്പന സൂപ്പര്‍ കിടിലന്‍സ് പുതിയ ഐ.പി.എല്‍ ടീം

18-Apr-2012

കട്ടപ്പന: മുംബൈയില്‍ വച്ച് നടന്ന ഐ.പി.എല്‍ ടീമുകളുടെ ലേലത്തില്‍ അപ്രതീക്ഷിതമായ ഒരു നീക്കത്തിലൂടെ കട്ടപ്പന ആസ്ഥാനമാക്കിയുള്ള സൂപ്പര്‍ കിടിലന്‍സ് കണ്സോര്‍ഷ്യം പുതിയ ടീമിനെ സ്വന്തമാക്കി. കോടമ്പാക്കം പിക്കിള്‍സ് ലിമിറ്റഡ്, വി. ഐ. പി. ബനിയന്‍ ആന്‍ഡ്‌ ജെട്ടീസ് തുടങ്ങിയ വന്‍ ബഹുരാഷ്ട്ര കുത്തകകളെ പിന്തള്ളിയാണ് കേരളത്തില്‍ നിന്നുള്ള സൂപ്പര്‍ കിടിലന്‍സ് കണ്സോര്‍ഷ്യം 3500 കോടി രൂപയ്ക്ക് ലേലം പിടിച്ചെടുത്തത്. തൊടുപുഴ പൊന്തക്കാട്ടില്‍ എട്ടുകാലി മമ്മൂഞ്ഞ് (റബ്ബര്‍ വെട്ട് ) ആണ് കണ്സോര്ഷ്യത്തിന്റെ ചെയര്‍മാനും സീ.ഇ.ഓ-യും. തങ്കമണി താഴത്തത്തറയില്‍ തൊരപ്പന്‍ വാസു (ഇഞ്ചി കൃഷി), ശിക്കാരി പാക്കരന്‍ (തടി വെട്ട്), രാജമ്മ രാജാക്കാട് തുടങ്ങിയ പ്രമുഖര്‍ക്ക് പുതിയ ടീമില്‍ ഓഹരി ഉള്ളതായി അറിയുന്നു.

അതേ സമയം സീ.ഇ.ഓ എട്ടുകാലി മമ്മൂഞ്ഞിന്റേയും തൊരപ്പന്‍ വാസുവിന്റേയും വീടുകളില്‍ ആദായനികുതി വകുപ്പ് അധികൃതര്‍ നടത്തിയ റെയ്ഡ് ഇപ്പോഴും തുടരുകയാണ്. നാലുകിലോയോളം വരുന്ന റബ്ബര്‍ ഷീറ്റും ഒരു കിലോ ഒട്ടുപാലും ഉള്‍പ്പെടെ അനേകം വിലപ്പെട്ട വസ്തുക്കള്‍ റെയ്ഡില്‍ പിടിച്ചെടുത്തതായി സ്ഥിരീകരിക്കാത്ത റിപ്പോര്‍ട്ടുകളുണ്ട്.

രാജാക്കാട് രാജമ്മക്ക് പുതിയ ടീമില്‍ പത്തൊന്‍പതു ശതമാനം സൌജന്യ ഓഹരിയുണ്ടെന്നും താനിതുവരെ അവരെ നേരിട്ട് കണ്ടിട്ട് പോലുമില്ല എന്ന ഐ. പി. എല്‍. ചെയര്‍മാന്‍ ലസിത് മസോധിയുടെ പ്രസ്താവന വിവാദമായിരിക്കുകയാണ്. എന്നാല്‍ രാജമ്മക്ക് സൌജന്യ ഓഹരി നല്കിയതാണോ അതോ അവര്‍ മസോധിയെ നേരിട്ട് ചെന്ന് കണ്ടില്ല എന്നതാണോ യഥാര്‍ത്ഥ പ്രശ്നമെന്ന ചോദ്യത്തിന് മറുപടി പറയാന്‍ അദ്ദേഹം വിസമ്മതിച്ചു.

പുതിയ ടീമിലെ ഭൂരിഭാഗം കളിക്കാരും മലയാളികളായിരിക്കുമെന്ന് സി. ഇ. ഓ എട്ടുകാലി മമ്മൂഞ്ഞ് ബൂലോകം ഓണ്‍ലൈനോട് പറഞ്ഞു. ഗോപുമോനെ ടീമില്‍ എടുക്കില്ല. അന്റാര്‍ട്ടിക്കയില് നിന്നും ആഫ്രിക്കയില്‍ നിന്നും ഏതാനും ചില വിദേശ കളിക്കാരെ കൊണ്ട് വരാനും ശ്രമം നടക്കുന്നുണ്ട്. പുതിയ ടീമിന്റെ ക്യാപ്ടനായി അടിമാലി ശശിയെ തിരഞ്ഞെടുത്തതായും അദ്ദേഹം വെളിപ്പെടുത്തി. അതിനിടെ ഐ. പി. എല്‍ ടീമില്‍ തങ്ങള്‍ക്കു ഇരുപതു ശതമാനം സംവരണം ഏര്‍പ്പെടുത്തണം എന്നാവശ്യപ്പെട്ട് സംസ്ഥാന ചുമട്ടു തൊഴിലാളി യൂണിയന്‍ രംഗത്തെത്തി. സംവരണം ഏര്പ്പെടുത്താത്തപക്ഷം കേരളത്തില്‍ വച്ച് നടക്കുന്ന ഐ. പി. എല്‍ മത്സരങ്ങള്‍ക്ക് നോക്കുകൂലി ഈടാക്കുന്നതാണെന്ന് യൂണിയന്‍ ഭാരവാഹികള്‍ മുന്നറിയിപ്പു നല്‍കി.


കട്ടപ്പന സൂപ്പര്‍ കിടിലന്‍സ് ടീമിന്റെ ഉടമസ്ഥര്‍ പിടികിട്ടാപ്പുള്ളി സുകുമാരക്കുറുപ്പിന്റെ ബിനാമികള്‍ ആണെന്നും സര്‍ക്കാര്‍ അഴിമതിക്ക് കൂട്ടുനില്ക്കുകയാണെന്നും ആരോപിച്ചു പ്രതിപക്ഷകക്ഷികള്‍ ഇന്ന് ഹര്‍ത്താല്‍ ആഹ്വാനം ചെയ്തിരിക്കുകയാണ്. രാഷ്ട്രീയ നേതാക്കളുടെ വാഹനങ്ങള്‍, പാര്‍ട്ടി കല്യാണങ്ങള്‍, പാര്‍ട്ടി പ്രവര്‍ത്തകരുടെ പ്രസവം എന്നിവയെ ഹര്‍ത്താലില്‍ നിന്നും ഒഴിവാക്കിയതായി പ്രതിപക്ഷനേതാവ് പത്രക്കുറിപ്പില്‍ അറിയിച്ചു.


സൂപ്പര്‍ കിടിലന്‍സ് ടീമിന്റെ ബ്രാന്‍ഡ് അംബാസഡര്‍മാരായി ഇഞ്ചക്കാട്ടില്‍ ശാരദയെയും ഇടിവെട്ട് കുട്ടപ്പനെയും പരിഗണിക്കുന്നതായി അറിയുന്നു. ചീര്‍ ഗേള്‍സിനെ ബ്രസീലില്‍ നിന്നും ഇറക്കുമതി ചെയ്യുമെന്നും അവരുടെ വേഷം മുണ്ടും ദാവണിയുമായിരിക്കുമെന്നും അറിവായിട്ടുണ്ട്. ചീര്‍ ഗേള്സിന് വേണ്ട എല്ലാവിധ സഹായങ്ങളും ചെയ്തു കൊടുക്കുവാനായി മഹേഷ്‌ വിജയനെ (കുപ്രസിദ്ധ ബ്ലോഗ്ഗര്‍, 28 വയസ്സ്, അവിവാഹിതന്‍) കണ്സോര്‍ഷ്യം ചുമതലപ്പെടുത്തി. ടീമിനെ പരിശീലിപ്പിക്കാനായി വനിതാ കോച്ചിനെ ഏര്‍പ്പെടുത്തിയില്ലെങ്കില്‍ ക്യാപ്ടന്‍ സ്ഥാനം രാജിവെക്കുമെന്ന് അടിമാലി ശശി ഭീഷണി മുഴക്കിയതായി ഞങ്ങളുടെ കട്ടപ്പന ലേഖകന്‍ റിപ്പോര്ട്ട് ചെയ്തു.


കട്ടപ്പന ടീമിന്റെ ഹോം മാച്ചുകള്‍ നടത്തുന്നതിനായി പുതിയ സ്റ്റേഡിയം നിര്‍മ്മിക്കാന്‍ ക്രിക്കറ്റ് അസ്സോസ്സിയേഷന്‍ തീരുമാനിച്ചു. കട്ടപ്പന ഇന്റര്‍നാഷണല്‍് എയര്‍പോര്‍ട്ടിനായി കണ്ടെത്തിയിരിക്കുന്ന സ്ഥലത്തിനടുത്തായാണ് സ്റ്റേഡിയം നിര്‍മ്മിക്കുക. അതിനിടെ കട്ടപ്പനയില്‍ ഐ. പി. എല്‍ മത്സരങ്ങള്‍ വരുന്നതോടു കൂടി ഗതാഗതക്കുരുക്ക് വന്‍തോതില്‍ വര്‍ദ്ധിക്കുമെന്നും ആയതിനാല്‍ ബസ്-ടാക്സി നിരക്കുകള്‍ ഉടന്‍ വര്‍ദ്ധിപ്പിക്കണമെന്നും സംയുക്ത മോട്ടോര്‍ വാഹന സമര സമിതി ആവശ്യപ്പെട്ടു.
കട്ടപ്പന ലോക ക്രിക്കറ്റ് ഭൂപടത്തിന്റെ നെറുകയില്‍ സ്ഥാനം പിടിക്കുന്ന കാര്യമായതിനാല്‍ പ്രബുദ്ധരായ കട്ടപ്പനയിലെ ജനങ്ങള്‍ നിരക്ക് വര്‍ദ്ധിപ്പിക്കുവാനുള്ള നീക്കത്തെ എതിര്‍ക്കില്ല എന്നാണു തങ്ങള്‍ പ്രതീക്ഷിക്കുന്നതെന്നും സമര സമിതി ഭാരവാഹികള്‍ കൂട്ടിചേര്‍ത്തു.


കട്ടപ്പന ടീമിന്റെയും കൊച്ചി ടീമിന്റെയും മത്സരവേദി്കളില്‍ പൊറോട്ടയും പപ്പടവും വില്‍ക്കുന്നതിനുള്ള കരാര്‍ ഉദയാനാണ് താരം എന്ന സിനിമയിലൂടെ ലോകപ്രശക്തനായ ചലച്ചിത്ര താരം സരോജ് കുമാര്‍ സ്വന്തമാക്കി. പൊറോട്ടയും പപ്പടവും വാങ്ങുന്നവരില്‍ നറുക്കെടുപ്പിലൂടെ ഒരു ഭാഗ്യശാലിക്ക്‌ സരോജ് കുമാറിന്റെ ഒപ്പം ഇരുന്നു നാരങ്ങവെള്ളം കുടിക്കുവാനുള്ള സുവര്ണ്ണാവസരം ലഭിക്കുന്നതാണ്.

കട്ടപ്പന സൂപ്പര്‍ കിടിലന്‍സ് ടീമിന്റെ പരിശീലന ക്യാമ്പ് മെയ്‌ രണ്ടു മുതല്‍ തൊടുപുഴ കണ്ടത്തില്‍ വര്ഗീസ് ചേട്ടന്റെ റബ്ബര്‍ തോട്ടത്തില്‍ വച്ച് നടക്കുന്നതായിരിക്കും. പങ്കെടുക്കുവാന്‍ താല്‍പ്പര്യമുള്ള 14-നും 65-നും ഇടയില്‍ പ്രായമുള്ള യുവാക്കള്‍ ഫിറ്റ്നസ് സര്‍ട്ടിഫിക്കറ്റുമായി അന്നേ ദിവസം രാവിലെ പരിശീലന സ്ഥലത്ത് എത്തിച്ചേരണമെന്ന് ടീം ഭാരവാഹികള്‍ അറിയിച്ചു.






9 comments:

  1. “ ചീര്‍ ഗേള്സിന് വേണ്ട എല്ലാവിധ സഹായങ്ങളും ചെയ്തു കൊടുക്കുവാനായി“

    സഹായിച്ചില്ലേലും ഉപദ്രവിക്കാതിരുന്നാല്‍ മതി.....:)

    ReplyDelete
  2. ചിയര്‍ ഗേള്‍സിനുവേണ്ട എല്ലാ സഹായവും..... ഉം, മനസ്സിലിരിപ്പു കൊള്ളാം :)

    ReplyDelete
  3. ചിയര്‍ ഗേള്‍സിനു വേണ്ടുന്ന എല്ലാസഹായവും ചെയ്തു കൊടുക്കാനായി- എന്തു സഹായമാണൂദ്ദേശിചതെന്നു വ്യക്തമാക്കണം. ഹും.. കൊച്ചുകള്ളന്‍, ഇവിടേ വേറെയും ബ്ളോഗ്ഗര്‍മാരുണ്ട്‌.

    ReplyDelete
  4. മനസ്സിലിരിപ്പ് കൊള്ളാം

    ReplyDelete
  5. അത് കലക്കി. ചിരിച്ചു.

    ReplyDelete
  6. ചിയര്‍ഗേളുകളുടെ വേഷം കൊള്ളാം മുണ്ടും ദാവണിയും! ങാ..പോട്ടെ അതെങ്കിലുമുണ്ടല്ലോ! :)

    ReplyDelete

പ്രിയ വായനക്കാരാ, ദയവായി എന്റെ തെറ്റുകള്‍, കുറവുകള്‍ എന്നോട് പറയൂ... ഒരുപക്ഷെ ഞാന്‍ നന്നായേക്കാം..