Thursday, September 24, 2009

ഭാവിയിലെ ഒരു സേവനം

"താങ്കള്‍ ഇപ്പോള്‍ ഡയല്‍ ചെയ്ത നമ്പറിന്റെ ഉടമ മരിച്ചു പോയി. ദയവു ചെയ്ത് അയാളുടെ നരകത്തിലെ പുതിയ നമ്പരിലേക്ക് വിളിക്കുക."

എന്തെല്ലാം സേവനങ്ങളാണോ ഈ മൊബൈല്‍ കമ്പനിക്കാര്‍ നല്കുന്നത്.
'നീ എവിടെ പോയാലും നിന്നോടൊപ്പം ഉണ്ടാകും' എന്ന അവരുടെ പരസ്യ വാചകം ഓര്‍മ്മ വന്നു.
ഇനി എങ്ങനെ ആണോ ആവോ അയാളുടെ, നരകത്തിലെ പുതിയ നമ്പര്‍ കണ്ടെത്തുന്നത്...?

വീണ്ടും അതെ നമ്പര്‍ ഡയല്‍ ചെയ്തു. കിളി നാദത്തില്‍ പഴയ സന്ദേശം വീണ്ടുമെത്തി. പിന്നെയും കാതോര്‍ത്തു.

"നിങ്ങള്‍ വിളിച്ചയാളുടെ പുതിയ നമ്പര്‍ അറിയുന്നതിന് ഒന്ന് എന്ന ബട്ടന്‍ അമര്‍ത്തുക. സബ്സ്ക്രിപ്ഷന്‍ ചാര്‍ജ് മുപ്പതു ഡോളര്‍ മാത്രം. താങ്കളുടെ മരണശേഷം നിങ്ങളുടെ നമ്പരില്‍ ഈ സേവനം ലഭ്യമാക്കുന്നതിനും ഈ പദ്ധതിയെക്കുറിച്ച് കൂടുതല്‍ വിവരങ്ങള്‍ അറിയുന്നതിനുമായി രണ്ട് എന്ന ബട്ടന്‍ അമര്‍ത്തുക. ഭൂമിയിലെ ഞങ്ങളുടെ പ്രതിനിധിയുമായി സംസാരിക്കുന്നതിനു......"

അക്ഷമയോടെ അയാള്‍ രണ്ട് എന്നമര്‍ത്തി.

"ഈ സേവനം താങ്കള്‍ക്കു തികച്ചും സൌജന്യമാണ്. ഈ പദ്ധതിയുടെ ഉപഭോക്താവാകാന്‍ നിങ്ങള്‍ ചെയ്യേണ്ടത് ഇത്രമാത്രം. മരണശേഷം നിങ്ങളുടെ പുതിയ നമ്പരില്‍ നിന്നും ഇനി പറയുന്ന ഫോര്‍മാറ്റില്‍ എസ്.എം.എസ് അയക്കുക. ഡി.എസ്.എസ്. സ്പേസ് നിങ്ങളുടെ പേരു സ്പേസ് പഴയ നമ്പര്‍. സ്വര്‍ഗത്തില്‍ നിന്നും എസ്.എം. എസ്. അയക്കേണ്ട നമ്പര്‍ പൂജ്യം പൂജ്യം രണ്ടു പൂജ്യം. നരകത്തില്‍ നിന്നുള്ളവര്‍ പൂജ്യം പൂജ്യം മൂന്നു പൂജ്യം എണ്ണ നംബറിലേക്കാണയക്കേണ്ടത്. മറ്റു സ്ഥലങ്ങളില്‍ നിന്നും...."

എല്ലാം മനസ്സിലായി എന്ന ഭാവത്തില്‍ അയാള്‍ ഫോണ്‍ ഡിസ്കണക്ട് ചെയ്ത് ടെലിഫോണ്‍ ഡയറക്ടറിയിലെ അടുത്ത നമ്പരിലേക്ക് കണ്ണോടിച്ചു.

3 comments:

പ്രിയ വായനക്കാരാ, ദയവായി എന്റെ തെറ്റുകള്‍, കുറവുകള്‍ എന്നോട് പറയൂ... ഒരുപക്ഷെ ഞാന്‍ നന്നായേക്കാം..